Khmer News

អតីតប្រធានគណបក្សសង្រ្គោះជាតិ លោក សម រង្ស៊ី នៅចុងសប្តាហ៍នេះ បានបញ្ជាក់ថា មានអ្នកដឹកនាំខ្លះ មានចរិតមិនល្អ មិនគិតគូរដោះស្រាយបញ្ហាប្រទេសជាតិទេ តែពូកែចំណាយពេល លបមើលគេ លួចស្តាប់គេ និងថតសំឡេងគេ យកទៅកាត់ត ដើម្បីលាតត្រដាងរឿងឯកជនរបស់អ្នកដទៃ ទោះជារឿងទាំងនោះជារឿងកំប៉ិកកំប៉ុក អត់មានទាក់ទងផលប្រយោជន៍ជាតិអ្វីសោះក៏ដោយ។ លោក សម រង្ស៊ី បានបន្តថា ថ្មីៗនេះ មានអ្នកដឹកនាំម្នាក់ បានចោទប្រកាន់ថា លោកបាននិយាយពីរឿងឯកជនរបស់គ្រួសារគាត់។ ដូច្នេះលោកសូមបញ្ជាក់ថា ចំពោះរឿងគ្រួសារអ្នកដទៃ ដែលជារឿងឯកជនរបស់គេ លោកមិនដែលចាប់អារម្មណ៍ ឬយកចិត្តទុកដាក់ទេ សូម្បីតែបន្តិចក៏គ្មានដែរ ហើយលោកមិនដែលយករឿងបែបនេះ ទៅនិយាយម្តងណាឡើយ ជាមួយនរណាឡើយ ទោះជារឿងនោះពិតឬក៏មិនពិតលោកមិនរវល់ទេ។ អតីតប្រធានគណបក្សសង្រ្គោះជាតិ លោក សម រង្ស៊ី បានពន្យល់ទៀតថា អ្នកដឹកនាំខាងលើនោះ ប្រើអំណាចរបស់ខ្លួន ដើរសម្លុតគេសម្លុតឯង ឲ្យមួលបង្កាច់លោក ថាលោកបាននិយាយពីរឿងគ្រួសារគាត់ ក្នុងកិច្ចប្រជុំមួយនៃគណបក្សសង្គ្រោះជាតិ។ រួចទៅ គេយកការចោទប្រកាន់នេះ ធ្វើជាលេសដើម្បីរករឿងលោក និងវាយប្រហារគណបក្សសង្គ្រោះជាតិ។ ជុំវិញបញ្ហាខាងលើនេះ លោក សម រង្ស៊ី បានសង្កត់ធ្ងន់ថា បើសួរអ្នកដែលគេបង្ខំឲ្យមួលបង្កាច់លោកនោះ ឲ្យគាត់បញ្ជាក់ថា តើលោកបាននិយាយដូចដែលគេមួលបង្កាច់នោះ នៅថ្ងៃណា នៅទីកន្លែងណា ក្នុងឱកាសជួបប្រជុំអ្វី ហើយមាននរណាខ្លះទៀតដែលបានចូលរួមក្នុងកិច្ចប្រជុំនោះ ហើយដែលបានឮនូវពាក្យដែលលោក បាននិយាយដូចដែលគេមួលបង្កាច់នោះ គឺគាត់មិនអាចបញ្ជាក់បានទេ ពីព្រោះរឿងនេះជារឿង ដែលគេប្រឌិតទាំងស្រុង ក្នុងគោលបំណងគ្រាន់តែរករឿងលោក និងវាយប្រហារគណបក្សសង្គ្រោះជាតិ តាមវិធីថោកទាបបំផុត៕